ហាវ៉ាណា៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានអញ្ជើញទៅដល់ទីក្រុងហាវ៉ានៃប្រទេសគុយបា ហើយដោយមានការទទួលស្វាគមន៍ពីរដ្ឋាភិបាលគុយបាយ៉ាងកក់ក្ដៅ។

តាមការឲ្យដឹងពីជំនួយការនាយករដ្ឋមន្ត្រីលោក កៅ គឹមហ៊ួន បានឲ្យដឹងថានៅពេលនេះប្រតិភូកម្ពុជាដែលដឹកនាំដោយសម្ដេចតេជោ បានទៅដល់ទីក្រុងហាវ៉ាណា នៃប្រទេសគុយបាហើយខណៈដែលរូបថតដែលលោកបានថតបង្ហាញឲ្យឃើញថាប្រទេសគុយបាបានទទួលស្វាគមន៍សម្ដេចតេជោដោយមានត្រែទ័ពចាំទទួលស្វាគមន៍ផងដែរ។

យន្តហោះគណៈប្រតិភូកម្ពុជាចាកចេញពីញ៉ូវយ៉ក សហរដ្ឋអាមេរិកនៅវេលាម៉ោង ៥និង២២នាទីល្ងាច ថ្ងៃទី២៣ ខែកញ្ញា ឆ្ពោះទីប្រទេសគុយបាដែលមានរយៈពេលហោះហេីរជាង៣ម៉ោង។

មុនហោះចេញទៅគុយបាសម្ដេចតេជោបានបង្ហោះសារមួយថា អស់រយៈពេល ៤៣ឆ្នាំហើយដែលចំណងទំនាក់ទំនងកម្ពុជា-គុយបានៅតែរក្សាបានយ៉ាងល្អក្រោមរដ្ឋបាលរបស់សម្ដេច ដែលស្មើនឹង២/៣ នៃទំនាក់ទំនងកម្ពុជា-គុយបាទាំងមូល។

សម្ដេចតេជោថា៖ «ក្នុងរយៈពេល ៦២ឆ្នាំនៃទំនាក់ទំនងរវាងកម្ពុជានិងគុយបាខ្លួនខ្ញុំបានរួមចំណែកពង្រឹងពង្រីកទំនាក់ទំនងនេះអស់រយៈពេល៤៣ឆ្នាំ (1979-2022) គឺស្មើនឹង២/៣នៃការធ្វើដំណើរទាំងមូល។ ទស្សនកិច្ចចុងក្រោយរបស់ខ្ញុំធ្វើឡើងនៅឆ្នាំ២០០០។ ខ្ញុំធ្វើទស្សនកិច្ចសារជាថ្មីម្តងទៀតក្នុងគោលបំណងពង្រឹងចំណងមិត្តភាពដែលមានស្រាប់ឱ្យកាន់តែរឹងមាំថែមទៀត»។

កម្ពុជា-គុយបាបានបង្កើតទំនាក់ទំនងការទូតក្នុងខែមេសា ឆ្នាំ១៩៦០៕